දකුණු අධිවේගී මාර්ගයට ඇතුළුවීමට හා පිටවීමට හැකි පිවිසුම් මාර්ගවල ඉතා ආසන්න ස්ථානවල ඉදිකිරීම් සිදුකිරීමේදී සීමා පැනවෙනු ඇතිබව ව්‍යපෘතියට සම්බන්ධ උසස් නිළධාරියෙකු කියයි.
“ලෝකයේ වෙනත් රටවලත් අධිවේගී මාර්ග වලට පිවිසෙන තැන්වල මෙවැනි ඉදිකිරීම් සීමාකර තිබෙනවා.“
යනුවෙන් හෙතෙම වැඩිදුරටත් කීය.
වැස්ස නිසා ඉදිකිරීම් වලට සිදුවූ බාධා හමුවේ සැලසුම් කර තිබූ පරිදි දකුණු අධිවේගී මාර්ගයේ පළමු අදියර වන කොට්ටාව මාකුඹුරේ සිට පින්නදූව දක්වා කොටස ලබන අප්‍රේල් මාසයේදී විවෘත කිරීමට නොහැකි බවත් එය ලබන වසරේ ජූලි වනවිට විවෘත කිරීමට සැලසුම් කර ඇති බවත් අතපත්තු මහතා මීට පෙර අප සමග පවසා තිබුණි.
මෙම මාර්ගය සියයට 50 ක් පමණ වගුරු බිම් හරහා ඉදිවන නිසා වැසි සහිත කාලගුණික තත්ත්වය එම වගුරු බිම් ආශ්‍රිත ඉදිකිරීම් සඳහා දැඩි බලපෑමක් කළබව හෙතෙම සඳහන් කළේය.
කොට්ටාව මාකුඹුරේ සිට මාතර ගොඩගම දක්වා කිලෝ මීටර් 126 ක දුරක් දිවෙන සේ පිවිසුම් ස්ථාන 11 කින් යුක්තව මෙම මාර්ගය සැලසුම් කර තිබෙන අතර මේ වනවිට පින්නදූවේ සිට මාතර ගොඩගම දක්වා කිලෝ මීටර් 30 ක් වන කොටසේ වැඩ අතරමග නතරවී තිබෙන්නේ එම කොටසට ප්‍රතිපාදන නොමැතිකම නිසායි.
කෙසේවෙතත්, රජය පසුගියදා සඳහන් කළේ පින්නදූවේ සිට මාතර ගොඩගම දක්වා කොටස ඉදිකිරීමට ඉදිරියේදී චීන එක්සිම් බැංකුවෙන් ණය ලබාගන්නා බවයි.
කොට්ටාව මාකුඹුර, කහතුඩුව, ගැලනිගම, දොඩං‍ෙගාඩ , වැලිපැන්න, කුරුඳුගහහැතැප්ම, නයාපාමුල , පින්නදූව, දීගොඩ, කොක්මාදුව සහ ගොඩගම යන පිවිසුම් ස්ථාන සහිතව ඉදිවන දකුණු අධිවේගී මාර්ගය නිසා දකුණු පළාතේ සංවර්ධනය ඉදිරියේදී වේගවත් වනු ඇතිබව අපේක්ෂා කෙරේ.
මාර්ගය කොට්ටාව මාකුඹුරේදී දැනට ඉදිවන පිටත වටරවුම් මාර්ගයට සම්බන්ධ වේ.
පහත දැක්වෙන්නේ දකුණු අධිවේගී මාර්ගයේ වැඩ නිමවී තිබෙන ස්ථාන කිහිපයක් දැක්වෙන අන්තර් ජාලයේ පළවන ඡායාරූප කිහිපයකි.
Post a Comment