Gossip Lanka News

ඔහු රූපවාහිනි මාධ්‍යය තුළ සුවිශේෂි පුද්ගලයෙක්. පුරා දශක දෙකකටත් වැඩි කාලයක් තිස්සේ ඔහු නිර්මාණය කළ අපූරු දේ අපි රසවින්දා. අද අපි ඔහු මුණ ගැසුණේ ඒ නිර්මාණ ගැන කතාබහකට නම් නොවෙයි. මේ නිර්මාණ ජීවිතයෙන් බැහැර වූ විට ඔහුගේ පෞද්ගලික ජීවිතය ගැන සොයන්නට අපට සිතුණා. විටෙක සුන්දර මෙන්ම විටෙක අසුන්දර තැන් වලින්ද පිරිපුන් ඒ ජීවිතය ඔහු අත් විඳින්නේ කිසිදු පසුබෑමකින් තොරවයි. නිවෙසක් සොඳුරු කරන බිරිඳකගේ ආදරණීය බව මේ නිවෙසේ දකින්නට නැතත් කිසිවකට සමකළ නොහැකි අප්‍රමාණ වූ දරු සෙනෙහසකින් මේ නිවෙස පිරිලා ඉතිරිලා කියලා මට හිතුණා.

මේ අපි ඇවිත් ඉන්නේ වර්තමානයේ ජාතික රූපවාහිනි සංස්ථාවේ අධ්‍යක්ෂක (විවිධ වැඩසටහන්) වරයෙකු වන දයාරත්න රටගෙදර ගේ නිවෙස වෙතටයි. රටගෙදර කවුරුත් ආදරේට අමතන්නේ ‘රටේ’ යනුවෙනි. මීට දශක තුනකටත් ඉහතදී කලා ලොවට අවතීර්ණ වූ රටගෙදර චිත්‍රපට සහාය අධ්‍යක්ෂවරයෙකු වශයෙන් වේදිකා නාට්‍ය අධ්‍යක්ෂවරයකු වශයෙන් සිනමා පත්තරකාරයෙකු වශයෙන් විවිධ භූමිකා නිරූපණය කළේය. රූපවාහිනිය මෙරට ආ මුල් යුගයේදීම නිෂ්පාදන සහකරුවකු වශයෙන් රූපවාහිනියට බැඳුණු ඔහු සහාය නිෂ්පාදකවරයෙකු, නිෂ්පාදකවරයෙකුගේ සිට අධ්‍යක්ෂ පදවියක් දක්වා ආ ගමන අභියෝගාත්මක වන්නට ඇත.

මේ අතරතුරම ඔහු අපට තිළිණ කළ නිර්මාණ ඔබට අමතක නැතුව ඇති. ‘මහමෙර පාමුල’, ‘දෑකැති මුවහත්’, ‘බෝගල සවුන්දිරිස්’ මේ හැම එකක්ම වින්දනාත්මක ටෙලි නිර්මාණයක අපූර්වත්වය රැගෙන එන්නට සමත්වූ ඒවාය. ඉන්පසු ඔහු සිනමාකරුවකු ලෙස දොරට වැඩියේ ‘නිල් දිය යහන’ චිත්‍රපටයෙනි. මේ සියල්ල වෙනුවෙන් සිය කාලය, ධනය, ශ්‍රමය වැය කළා සේම ඔහුගේ පෞද්ගලික ජීවිතයේ විවිධ අභිප්‍රායන් ඉටුකර ගැනීමට ගත් ප්‍රයත්නයද ප්‍රශංසනීය.

අද ඔහු පදිංචි වී සිටින්නේ මිරිහානේ ජය මාවතේ පිහිටි ඔහු විසින්ම තනා ගන්නා ලද අලංකාර දෙමහල් නිවෙසේය. මේ නිවෙස ආදරෙන් සෙනෙහසින් පුරවාලන තැනක් බවට පත් කරනු ලබනුයේ නොයෙක් වද වේදනා මධ්‍යයේ අසීරුවෙන් ලොකු මහත් කරගනු ලැබූ ආදරණීය දියණියන් තිදෙනා විසිනි. දැන් මේ තිදෙනාම නව යොවුන් යුවතියෝය. කුඩා කල පටන්ම මේ දරුවන් තිදෙනාගේ වගකීම සහ ඔවුන් ඇතිදැඩි කිරීම පිණිස ඔහුට සවියක් වූයේ ඔහුගේ දයාබර නැන්දණියය. අදටත් මේ දියණියන්ගේ වගකීම, ආරක්ෂාව මෙන්ම දුක සැප බලමින් උයා පිහා, කවා පොවන්නී ඇයයි.

”මම ජීවිතේ විවිධ අවස්ථාවල විවිධ අභියෝගයන්ට මුහුණ දුන් කෙනෙක්. අපේ අප්පච්චි නුවර පළාතේ කෙනෙක්. අම්මා දකුණු පළාතේ. මම පවුලේ වැඩිමලා. මට බාල නංගිලා මල්ලිලා පස්දෙනෙක් ඉන්නවා. මට අවුරුදු 20 – 25 වෙනකොට අප්පච්චි නැතිවෙනවා. ඊට පස්සෙ පවුලෙ වගකීම් දරන්න වෙනවා. විවාහ වෙලා දරුවෝ ලැබුණට පස්සේ දරුවන්ගේ වගකීම් මගේ තනිකර පිට පැටවෙනවා. ඉතින් මේ කොයි දේටත් ධෛර්යයෙන් මුහුණ දීලා තිබෙනවා. ජීවිතේ ගැන ආපස්සට හිතත්දි විවිධ අභියෝගයන්ට මුහුණ දුන්නට අද මට සතුටක් දැනෙනවා.”

”දැන් මගේ ජීවිතේ ලොකුම සම්පත මගේ දරුවෝ තුන්දෙනා. ආච්චි අම්මත් එක්ක ඒ ගොල්ල බොහොම හොඳට හැදිලා තිබෙනවා. මේ තුන්දෙනා මේ තරමට ලොකු මහත් කරන්න විශාල දුකක් වින්දාට මගේ නැන්දම්මා තමයි ඒකට මට සවි ශක්තිය දුන්නේ. කිසි අඩුපාඩුවක් නොවෙන්න ඒ තුන්දෙනා මම බලා ගත්තා.”

රටගෙදර කියන්නේ අප්‍රමාණ දරු සෙනෙහසින්. නව යොවුන් යුවතියන් තිදෙනෙකු ඉන්නවා කියන්නේ පියෙකුට රටක් රාජ්‍යයක් වගේ. පුංචි කාලේ ආදරෙන් බලාගත්තා වගේ මේ දියණියන් තුන්දෙනාත් අප්පච්චිව ආදරෙන් බලාගනීවිනේ කියලා මට හිතුණා.

මේ නිවෙසේ වැඩිමල් දියණිය ජිනාලි පියසාරි. ඇය නුගේගොඩ ශාන්ත ජෝශප් බාලිකා විද්‍යාලයෙන් අ.පො.ස. උසස් පෙළ කරල ප්‍රතිඵල බලාපොරොත්තුවෙන් ඉන්නවා. දෙවැනි දියණිය ගයාත්‍රි ඉන්දීවරී. ඇය නුගේගොඩ අනුලා විද්‍යාලයේ අ.පො.ස. සා.පෙළ පන්තියේ ඉගෙනුම ලබනවා. බාලම දියණිය චත්‍රිකා ඕෂධී. ඇය අනුලා විද්‍යාලයේ 9 වැනි වසරේ ඉගෙනුම ලබනවා.

අපේ ගෙදර උදේ පාන්දරින්ම අවදි වෙන්නේ අපේ නැන්දම්මා. එයා දරුවන්ට කන්න ගෙනියන්න උයනවා. උදේ 7.00 වෙනකොට දරුවෝ තුන්දෙනාම ඉස්කෝලෙ යන්න පිටත් වෛනවා. මම උදේ නැගිට්ට ගමන් කරන්නේ නාන එක. ඊට පස්සේ මල් පහන් පූජා කරල 8.00 වෙනකොට පිටත් වෙනවා ඔෆිස් යන්න.

ඇත්තටම කාර්යාලයේ වැඩ, නිර්මාණ කටයුතු ආදී මේ හැම දෙයක්ම කරගන්න මට නිදහස ලැබුණේ ගෙදර ගැන, දරුවෝ ගැන නැන්දම්මා බලන නිසයි.

නැන්දම්මා වුණත් රටගෙදර කටපුරා ඇය අමතන්නේ ‘අම්මා’ යනුවෙනි. මේ අතරතුර රටගෙදරගේ මවද නිතර මේ නිවෙසට පැමිණ සතියක් දෙකක් ඉඳ යයි.

අපි ඔහුගේ නිවෙසට යන මොහොතේත් ඔහුගේ අම්මා මේ නිවෙසේ රැඳී සිටියා.

’මම කොහේ ගියත් හැම වෙලේම මගේ හිතේ තියෙන්නේ මෙයා ගැන.’ අම්මා කීවේ තම වැඩිමල් පුතා ගැන උපන් ස්නේහයෙන්.

දරුවෝ තුන්දෙනාට නිතර අප්පච්චි සමඟ කාලය ගත කරන්න ඉඩක් නැත්තේ රටගෙදර අතිශයින්ම කාර්ය බහුල ජීවිතයක් ගත කරන නිසා. එහෙත් මේ දරුවන්ගේ අවශ්‍යතා සියල්ලට ඔහු ඇහුම්කන් දෙන්නේ ආදරෙන්.

”උදේට යන්න ලෑස්ති වුණාම තුන්දෙනා තුන්විදිහක අවශ්‍යතා කියනවා. අප්පච්චි මට මෙච්චර සල්ලි ඕන. අප්පච්චි මට අරක ඕන. මේක ඕන. ඔහොම තමයි ඉතින් ජීවිතේ.”

මේ දරුවෝ තුන්දෙනාම කලාවට කැමැතියි. ඒ වුණාට ඒ බව පෙන්වන්න කැමැති නෑ. වැඩිමල් දියණිය ඉස් ඉස්සරලම රඟපෑවේ රටගෙදරගේ ‘මහමෙර පාමුල’ ටෙලි නාට්‍යයේ’ එවකට ඇය මාස 02 – 03 ක සිඟිත්තියක්. ඊට පසු ඇය රටගෙදරගේ ‘නිල් දිය යහන’ චිත්‍රපටයේ ද රංගනයට එක් වුණා. දෙවන දියණියත් වෙළෙඳ දැන්වීම් කිහිපයකටම සම්බන්ධ වී තිබෙනවා.

දරුවන්ගේ නැටුම් ගැයුම් ඔක්කොම අප්පච්චි නැති වෙලාවට කාමරේට වෙලා දොරවල් වහගෙනි කියලයි රටගෙදර කිව්වේ.

වසර කිහිපයක් රජයේ චිත්‍රපට අංශයේ ද සේවය කළ රටගෙදර නැවත රූපවාහිනියට එක් වූයේ ගරු ජනාධිපතිතුමාගේ උපදෙස් පිටය. ජනපතිතුමන් විපක්ෂ නායකව සිටි කාලයේ සිට එතුමන්ගේ බොහෝ දැන්වීම්, වාර්තා චිත්‍රපට ආදිය වැඩිපුරම නිම වූයේ ඔහු අතිනි.

”මම ජීවිතේ බොහෝ දේවල් සැහැල්ලුවෙන් දරා ගත්ත මිනිහෙක්. දැන් මගේ දරුවෝ ලොකුයි. ඒ අයගේ අනාගතේ ගැන හිතන්න ඕන. ජීවිතේ හැමදාම මට දරුවෝ ළඟ තියාගන්න බැරි වේවි. ඒ වුණාට ඒ මොහොත ගැන මම හිතන්නේ නැතුව ඉන්නවා. මේ ගේ පිරිලා තිබෙන්නේ ඒ තුන්දෙනාගේ හිනාවෙන් කතා බහෙන්. ඒක නැතිවෙන එක ගැන හිතන්න අමාරුයි. ආපස්සට හිතලා බලත්දි යම් යම් කාලවලදි ප්‍රශ්න ආවත් සැහැල්ලුවෙන්, සතුටින් ජීවිතය ගත කරලා තිබෙනවා. ඒ සතුටට විශේෂ හේතුවක් වෙන්න ඇත්තේ මගේ දරුවෝ තුන්දෙනයි.

හේමාලි විජේරත්න

ඡායාරූප
දුෂ්මන්ත මායාදුන්න