* පිරිවැටුම මිලියන 570326ක්
* ප්‍රාග්ධනය බිලියන 2210ක්
* මිල දර්ශකය ඒකක 6635ක්
ශ්‍රී ලංකාවේ කොටස් වෙළෙඳපොළ ලෝකයෙන්ම දෙවැනි තැනට
ජගත් බ්ලූම්බර්ග් වාර්තාව කියයි
කොටස් වෙළෙඳපොළ වර්ධනය අනුව පසුගිය වර්ෂය අවසන් වන විට ලෝකයේ දෙවැනි හොඳම කොටස් වෙළෙඳපොළ බවට කොළඹ කොටස් වෙළෙඳපොළ පත්ව තිබේ. සෑම මිල දර්ශකයකම අගය ඉහළ යමින් කොළඹ කොටස් වෙළෙඳපොළ මේ තත්ත්වය කරා ඉතා පහසුවෙන් ළඟා වී ඇතැයි ජාත්‍යන්තර බ්ලූම්බර්ග් වාර්තාව පෙන්වා දෙයි.
ඒ අනුව පසුගිය 2009 වර්ෂය අවසන් වන විට රුපියල් මිලියන 142462.6ක්ව පැවැති කොටස් වෙළෙඳපොළ පිරිවැටුම පසුගිය 2010 වර්ෂය අවසන් වන විට එම අගය රුපියල් මිලියන 570326.8 දක්වා ඉහළ ගොස් ඇතැයි කොළඹ කොටස් වෙළෙඳපොළේ ජ්‍යෙෂ්ඨ ප්‍රකාශිකාවක් ‘දිනමිණ’ ට පැවැසුවා ය.
වර්ෂයක කාලයේ කොළඹ කොටස් වෙළෙඳපොළ ශීඝ්‍රයෙන් වර්ධනය වී තිබෙන අතර එය කොළඹ කොටස් වෙළෙඳපොළ ඉතිහාසයේ ඉහළම වර්ධනය බවද ඇය සඳහන් කළා ය. තවද සාමාන්‍ය දෛනික පිරිවැටුමේ අගය ද ඉහළ යමින් 2009 වර්ෂය අවසන් වන විට රුපියල් මිලියන 593. 6ක්ව පැවැති අගය 2010 වර්ෂය අවසන් වන විට රුපියල් මිලියන 2396.6ක් දක්වා ඉහළ ගොස් තිබෙන බවත් මුළු ගනු දෙනු සංඛ්‍යාව 1266299 සිට 3355126 දක්වා ඉහළ ගොස් තිබෙන බවත් එම ප්‍රකාශිකාව කීවා ය.
මේ අතර කොටස් වෙළෙඳ පොළ වර්ධනය අතින් ලොව දෙවැනි හොඳම කොටස් වෙළෙඳපොළ බවට පත් වූ කොළඹ කොටස් වෙළෙඳපොළ 2009 වර්ෂය අවසන් වන විට රුපියල් බිලියන 1091 .1 ක්ව පැවැති වෙළෙඳ පොළ ප්‍රාග්ධනීකරණය 2010 වර්ෂය අවසන් වන විට රුපියල් බිලියන 2210.5ක් බවට පත්ව තිබේ.
2009 වර්ෂයට සාපේක්ෂව ඒකක 3250.3ක වර්ධනයක් පෙන්නුම් කළ සියලු කොටස් මිල දර්ශකය 2010 වර්ෂය අවසන් වන විට ඒකක 6635.9 ක් ද පෙන්නුම් කරන අතර මිලංකා මිල දර්ශකය ඒකක 3212.1ක වර්ධනයක් පෙන්නුම් කරමින් ඒකක 7061.5 ක් දක්වා වර්ධනය වී ඇත. ශ්‍රී ලංකාවේ ආර්ථික වර්ධනය හා විදේශීය ආයෝජකයන් වැඩි වැඩියෙන් ශ්‍රී ලංකාවේ ආයෝජන කටයුතු සඳහා පෙළඹීම මේ වර්ධනයට බලපා ඇතැයි ද ඇය වැඩි දුරටත් කීවා ය.
දිනමිණ පුවත්
Post a Comment