Gossip Lanka News

මම හොඳක් අහන දවසක් නැති තරම්

හිතට වහල්වීමි නිම්මි ඇයයි

මේ දවස්වල සිරස රූපවාහිනිය ඔස්සේ රාත්‍රී 7.30 ට විකාශය වන ‘සිතට වහල් වීමි’ බොහෝ ප්‍රේක්ෂකයන්ගෙ සිත් ගත් ටෙලි නාට්‍යයක්. එහි නිම්මිගෙ චරිතයට පණ පොවන ඩිනක්ෂි ප්‍රියසාද් ඒ තරමටම ප්‍රේක්ෂකයන් අතර ජනප්‍රිය චරිතයක් වෙලා. රූගත කිරීම් අතරතුර සිටි ඈ අප සමඟ කතාබහට එක් වුණා.

මොකද ඔය තරම් නපුරු?

මම ගැනද ඔය අහන්නෙ.

නැත්නම්?

මම ගැන ඔය විදියට නම් හිතන්න එපා.

එහෙම කියල බේරිලා යන්න ද හදන්නෙ?

මේ දවස්වල මට තියෙන ලොකුම ප්‍රශ්නය ඕක තමයි.

මොකක්ද?

හැමෝම අහන්නෙ මම ඔය තරමටම නපුරු ඇයි කියලමයි.

ඇත්තම කතාව ඒකද?

අපොයි නැහැ. ‘සිතට වහල් වීමි’ ටෙලි නාට්‍යයේ නිම්මිගේ චරිතය මගෙ රංගන ජීවිතය තුළ මට ලැබුණු එක් චරිතයක් විතරයි.

ඔය ඇත්තමද කියන්නෙ?

නැත්නම්. නිම්මිගෙ චරිතය නිසා මම කොහෙවත් යන්නෙ නැහැ. එක් අතකින් මට හරියට දුකත් හිතෙනවා.

ඒ මොකද?

මගේ ප්‍රේක්ෂකයො මං ගැන වැරැදි විදියට හිතන නිසයි.

ඒකෙන් එක දෙයක් පේනවා.

මොකක්ද?

හොඳට හිතලා බලන්න.

නිම්මිගෙ චරිත නිරූපණය හරිම සාර්ථකයි කියලද ඔය කියන්නෙ.

ඔයාට එහෙම හිතෙනවද?

මොහාන් නියාස් අංකල් මේ ටෙලි නාට්‍ය රූගත කරන මුල් දවස්වලම ඔය කතාව මට කිව්වා.

කවුද ඒ?

‘සිතට වහල් වීමි’ ටෙලි නාට්‍යයෙ අධ්‍යක්ෂවරයා. ඔහු තමයි මේ ටෙලි නාට්‍යයේ නිම්මිගෙ චරිතයට මාව තෝර ගත්තෙ.

ඒ කොහොමද?

මුලින්ම මම රඟපෑවේ ‘වස්සාන සිහිනය’ ටෙලි නාට්‍යයේ චාපාගෙ චරිතයයි. ඒ චරිතය ප්‍රේක්ෂකයන් අතර බොහොම ජනප්‍රිය වුණා. අදත් බොහෝ ප්‍රේක්ෂකයන් මට කතා කරන්නෙ ‘චාපා’ කියලයි. මාව ඒ චරිතයට තෝර ගත්ත ජානක අංකල්ට වගේම උපුල් ශාන්ත සන්නස්ගල අංකල්ට මම ස්තුතිවන්ත වෙනවා. මොකද? මේ ටෙලි නාට්‍යයෙ කළ චරිතය නිසාම නිම්මිගෙ චරිතය මට ලැබුණා. ඒක නිසා මට දැනෙන්නෙ සතුටක්.

ඒ සතුටට තවත් හේතු තිබෙනවාද?

නිම්මි ගැන සිතන කොට ඒ සතුට දෝරෙ ගලා යනවා. නිම්මි කියන්නේ දම්මි කියන තම සහෝදරියට දැඩි සේ ආදරය කරන සොහොයුරියක්. ඒ දෙන්නගෙ අම්මා නෑ. තාත්තා රැකියාව කරන්නේ බොහොම ඈතක. ඔවුන් බලා ගන්නේ රූපා අම්මා. නිම්මිත්, දම්මිත් දෙන්නට දෙන්න හරිම ආදරෙයි. දම්මි හරිම බොළඳ චරිතයක්. එයා මේ බොළඳකම නිසාම අමාරුවේ වැටෙන අවස්ථාවන් බොහොමයි.

නිම්මි කරන්නෙ දම්මිව ඒ බොළඳකමින් ඈත් කරන එකද?

ඇත්තටම. මේ දවස්වල එයා බස් කොන්දොස්තර කෙනෙකුට ආදරය කරනවා.

ඔයා ඒකට කැමැති නෑ වගෙයි.

ඒ සම්බන්ධය අපේ පවුලට කොහෙත්ම ගැළපෙන්නේ නෑ.

හේතුව ඒක විතරමද?

එහෙමම නෙමෙයි. මගේ සහෝදරිය විවාහ වෙනවට මම කොහෙත්ම කැමැති නෑ.

ඇයි ඒ?

අම්මා නැති වුණදා ඉඳලා අපි දෙන්න හිටියෙ එකටමයි. එහෙම හිටිය අපි දෙන්නාගේ වෙන්වීම මට දරාගන්න පුළුවන් කියලද හිතන්නේ?

සැබෑ ජීවිතයෙදිත් ඔය වගේමද?

මට ඉන්නෙ නංගිලාම දෙන්නෙක්. ලොකු නංගි ශේෂාද්‍රි, පොඩි නංගි ශනුද්‍රියි. ඒ දෙන්නත් රඟපානවා. අපි හරිම එකමුතුයි. එහෙම කියලා ඔවුන්ගේ අනාගතය වෙනුවෙන් සිද්ධ වෙන හොඳ දෙයකට මම අකුල් හෙළන්නේ නෑ.

ඔයාගෙ රංගනය ගැන එයාලා මොකද කියන්නේ?

පුංචි වරදක්වත් කරන්න බැහැ. අතන වැරැදියට ඔයා රඟපෑවා. තව එතන හොඳට කරන්න තිබුණා කියලා ඔවුන්ගෙන් මට ලැබෙන්නෙ විවේචන තමයි.හොඳක් අහන දවසක් නැති තරම්.

ඔය ඇත්තමද?

නැත්නම්. තාත්තා වුණත් විශේෂ යමක් කියන්නේ නැහැ. නමුත් ඔහු මම රඟපාන නාට්‍ය බලන බව දන්නවා. අම්මා ශිරාණි ප්‍රියසාද්. අපේ හැම කටයුත්තකටම උදව් වෙන්නෙ ඈ තමයි.

තාත්තගෙ දැනහැඳුනුම්කම් ප්‍රයෝජනවත් වෙන්න ඇති.

මුලින්ම ගිය සම්මුඛ පරීක්ෂණයේදී මම ඒ වග සඳහන් කළේ නැහැ. නමුත් ඔහු පස්සෙ දැනගෙන තිබුණා මම දිනේෂ් ප්‍රියසාද්ගෙ දියණියක් කියලා.

මේ දවස්වල කාලය ගත වෙන්නෙ?

හැම නාට්‍යයකම රූගත කිරීම් අවසානයි. ස්වර්ණවාහිනියේ ඉරිදා රාත්‍රී 8.30 ට ‘සඳගිරි පව්ව’ ටෙලි නාට්‍යය විකාශය වෙනවා. ඊට අමතරව අලුත් අවුරුද්දෙ ටෙලි නාට්‍ය කිහිපයකටම ආරාධනා ලැබුණා. නමුත් දින ප්‍රශ්නයක් නිසා මම ඒ ආරාධනාවලට තවම වචනයක් දුන්නේ නැහැ.

එහෙම හොඳද?

පෙබරවාරි, මාර්තු විතර වෙනකොට මගේ විභාගය පැවැත්වෙනවා.ඒ නිසා රඟපෑම් කටයුතුවලට වගේම ඒ කටයුතුත් මට බොහොම වැදගත්.

මොකක්ද මේ විභාගෙ?

මම ඉගෙන ගන්නෙ ඉංජිනේරු තාක්ෂණයයි. ඉතිං ඒකට ගොඩක් මහන්සි වෙන්න සිද්ධ වෙයි. ඒකට අමතරව ජයවර්ධනපුර විශ්ව විද්‍යාලයෙ ලේඛකත්ව සන්නිවේදනය පිළිබඳ පාඨමාලාවක් හදාරනවා.

වැඩ ගොඩයි.

ඉදිරියේදී රංගන ශිල්පිනියක් වෙනවාට වඩා අධ්‍යක්ෂණය කියන අංශයට සිත යොමු කරන්නත් මම කැමැතියි. ඒ පිළිබඳව හොඳින් හැදෑරිය යුතුයි. ඒ නිසා වැඩ කටයුතු රාශියක් අතර අතරමං වෙන්නයි මට සිද්ධ වෙන්නේ.

- තිලානි ශානිකා විතානාච්චි

සේයාරූ – ටෙනිසන් එදිරිසිංහ