අමීශා පටෙල්ට සොරකම් චෝදනාවක්
"කහෝනා ප්‍යාර් හේ" චිත්‍රපටයෙන් සිය රංගන ජීවිතය ඇරඹි බොලිවුඩ් රංගන ශිල්පිණී අමීශා පටෙල් යනු සිය ඥාතීන් නිසා විවිධ ගැහැට වලට මුහුණදීමට සිදුවූ රංගන ශිල්පිණියකි. සිය රංගන ජීවිතයෙන් අමීශා උපයාගත් සියලු මුදල් ඇයගේ මව්පියන් එක්ව ඔවුන්ගේ පෞද්ගලික ප්‍රයෝජනය සඳහා යොදාගැනීම නිසා අමීශාට බොහෝ දුෂ්කරතාවයන්ට මුහුණපෑමට සිදුවිය. එමෙන්ම එම සිදුවීමත් සමග ඇය සිය මව්පියන්ගෙන් ඈත්වීමට තීරණය කළාය. පසුව අමීශා විසින් ඉන්දීය රුපියල් මිලියන 120 ක මුදලක් නැවත ලබාගැනීම සඳහා සිය මව්පියන්ට එරෙහිව නීතිමය පියවර ගනු ලැබීය.
දැන් නැවතත් ඇයට තවත් අකරතැබ්බයකට මුහුණදීමට සිදුව ඇති බව වාර්තා වේ. අමීශාගේ මාමා වන නලින් රජ්නි පටෙල් විසින් ඇයට එරෙහිව සොරකම් චෝදනාවක් එල්ල කර තිබේ. ඇය සතුව පැවති සැබෑ යතුරට සමාන යතුරක් උපයෝගී කරගනිමින් අමීශා මනාලිහි පිහිටි සිය නිවසට ඇතුළුවී ඇති බවට රජ්නි විසින් පොලීසියට පැමිණිල්ලක් කර ඇති බව සඳහන්ය. එසේ නීතිවිරෝධීව නිවසට ඇතුළුව තමන්ට හා සොයුරු සුනිල්ට අයත් නිවසේ ඔප්පු ලියවිලි කිහිපයක් අමීශා විසින් සොරගෙන ගොස් ඇති බව ද ඔහු සඳහන් කර තිබේ. එම අවස්ථාවෙහි කිසිවකු නිවසේ රැදීසිට නොමැති බව ද සඳහන්ය.
මෙම සිද්ධිය පිළිබඳව වැඩිදුර පරීක්ෂණ කටයුතු සිදුකරන බව පොලිසිය සඳහන් කරයි. සිද්ධිය පිළිබඳව තමන් සහ සොහොයුරා දැනුවත් වූයේ අසල්වැසියකු විසින් කිසියම් පුද්ගලයෙකු අගුළු ලා තිබූ ඔවුන්ගේ නිවසට ඇතුළුව ඇති බව දුරකථන ඇමතුමක් මගින් දැනුම් දුන් පසුව බව ද රජ්නි පොලිසිය වෙත ප්‍රකාශ කර ඇති බව සඳහන්ය. ඒ පිළිබඳව විමසා බැලීමේදී එසේ නිවසට ඇතුළුව ඇත්තේ අමීශා බව දැනගන්නට ලැබුණු බව ද ඔහු ප්‍රකාශ කර තිබේ.
එමෙන්ම අමීශා පටෙල්ට එරෙහිව මානව හිමිකම් කඩකිරීම පිළිබඳ වාර්තාවක් ගොනුකිරීමට ඩෙකෑන් පොලිසිය අසමත් වීම පිළිබඳව රජ්නි පටෙල් කළකිරීමට පත්ව ඇති බව ඉන්දීය මාධ්‍ය වාර්තා කරයි. ඔවුන් මෙම සිද්ධිය සිවිල් ගැටලුවක් ලෙස සැලකීම පිළිබඳව ද ඔහු චෝදනා කරයි. මේ සම්බන්ධව මාධ්‍ය වෙත අදහස් දැක්වීමට ද අමීශා ඉදිරිපත්ව නොමැති බව වාර්තා වේ. නමුත් ඇය සිය නීතිඥයින් මාර්ගයෙන් සාධාරණය ඉෂ්ට කරගැනීමට බලාපොරොත්තු වන බව ද සඳහන්ය.
Post a Comment